حضرت ابوبرز رضی اللہ عنہٗ بیان کرتے ہیں کہ حضور نبی اکرم ﷺ نے فرمایا: آدمی کے دونوں قدم (روز قیامت) اس وقت تک استقامت نہیں پاتے جب تک اس سے چار چیزوں کے بارے میں سوال نہ کرلیا جائے اس کے جسم کے بارے میں کہ کس چیز میں اس نے اس کو امتحان میں ڈالا اور اس کی عمر کے بارے میں کہ اس چیز میں اس نے اس کو فنا کیا اور اس کے مال کے بارے میں کہ کہاں سے اس نے اسے کمایا؟ اور کس چیز میں اس نے اس کو خرچ کیا؟ اور اہل بیت کی محبت کے بارے۔ پس عرض کیا گیا: یارسول اللہ ﷺ! آپ ﷺ کی محبت کی کیا علامت ہے؟ توآپ ﷺ نے اپنا دست اقدس حضرت علی رضی اللہ عنہٗ کے کندھے مبارک پر مارا۔ (امام طبرانی)

٭حضرت مسور بن مخرمہ رضی اللہ عنہٗ سے روایت ہے کہ حضور نبی اکرم ﷺ نے فرمایا: فاطمہ (رضی اللہ تعالیٰ عنہا) میرے جسم کا ٹکرا ہے پس جس نے اسے ناراض کیا اُس نے مجھے نارض کیا۔ (امام بخاری)حضرت علی رضی اللہ تعالیٰ عنہٗ سے روایت ہے کہ حضور نبی اکرم ﷺ نے سیدہ فاطمہ رضی اللہ تعالیٰ عنہا سے فرمایا: بیشک اللہ تعالیٰ تیری ناراضگی پر ناراض ہوتاہے اور تیری رضا پر راضی ہوتا ہے۔‘‘ (حاکم‘ طبرانی)
٭حضرت جمیع بن عمیر تیمی رضی اللہ تعالیٰ عنہٗ بیان کرتے ہیں کہ میں اپنی پھوپھی کے ہمراہ حضرت عائشہ رضی اللہ تعالیٰ عنہا کی خدمت میں حاضر ہوا اور پوچھا: حضور نبی اکرم ﷺ کو کون زیادہ محبوب تھا؟ ام المومنین رضی اللہ تعالیٰ عنہا نے فرمایا: فاطمہ سلام اللہ علیہا۔ عرض کیا گیا: مردوں میں سے (کون زیادہ محبوب تھا)؟ فرمایا: ان کے شوہر‘ جہاں تک میں جانتی ہوں وہ بہت زیادہ روزے رکھنے والے اور راتوں کو عبادت کرنے والے تھے۔‘‘ (امام ترمذی‘ امام حاکم)
٭ ام المومنین حضرت عائشہ صدیقہ رضی اللہ تعالیٰ عنہا نے فرمایا: حضور نبی اکرم ﷺ نے سیدہ فاطمہ رضی اللہ تعالیٰ عنہا سے فرمایا: اے فاطمہ!(رضی اللہ تعالیٰ عنہا) کیا تو اس بات پر راضی نہیں ہے کہ تم مسلمان عورتوں کی سردار ہو یا میری اس امت کی سب عورتوں کی سردار ہو۔‘‘ (متفق علیہ حدیث)